Handelingen van apostels 12
01Om dizze tied luit keunenk Herodes n stokkewat lu van gemainte oppakken en tamtaaiern.
02Jakobus, Johannes zien bruier, luit e mit t sweerd ombrengen.
03Dou e zag dat Jeuden dit wel aanston, ging e wieder en luit ook Petrus oppakken. t Was net in doagen van t feest van Broden-zunder-gèst.
04Dou e hom grepen haar, zette hai hom in t gevang. Vaaier koppels van elks vaaier soldoaten mozzen op hom pazen. Hai haar in t zin om hom noa Pesachfeest in t openboar te berechten.
05Zo wer Petrus in gevangenis bewoakt. Mor in gemainte wer aalaan veur hom tou God beden.
06Net in naacht veurdat Herodes hom veur t verheur nemen wol, lag Petrus aan twij kettens tussen twij soldoaten in te sloapen. Boeten veur deur van t gevang stonden ook nog n poar man op wacht.
07Dou kwam der inains n engel van de Heer bie hom stoan en der stroalde licht in zien cel. Hai stötte Petrus wakker en zee: "Kom gaauw in t èn!" Doalek vuilen kettens hom van handen òf.
08"Dou dien raim om en sandoalen aan," zee engel tegen hom. Dat dee e. Engel zee: "Dou dien bovenklaid om en kom achter mie aan."
09Petrus ging mit hom noar boeten tou, mor t drong nait tou hom deur dat t eerns was wat of engel dee. Hai dochde dat e dreumde.
10 Ze gingen eerste en twijde wachtpost verbie en kwammen bie iesdern poort doar ze deur in stad kommen konden. Dij ging vanzulm veur heur open. Ze gingen noar boeten tou en laipen ain stroat deur. Votdoalek luit engel hom allain.
11 Petrus kwam tou zokzulm en zee: "Nou wait ik zeker dat de Heer zien engel stuurd het om mie oet Herodes zien macht te verlözzen. Zo wol e mie t aal bespoaren doar of t Jeudse volk op zit te vlazzen."
12 Dou e dat goud deurkreeg, ging e noar Maria heur hoes tou. Maria was moeke van Johannes, dij ook Marcus nuimd wordt. Doar wazzen hail wat mensken bie nkander kommen. Ze wazzen aan t beden.
13 Dou e op boetendeur klopt haar, kwam maaid, Rooske haitte ze, om deur open te doun.
14 Dou ze aan zien stem heurde dat t Petrus was, vergat ze van bliedschop deur open te doun. Ze runde in hoes om te vertellen dat Petrus veur deur ston.
15 "Bist nait wies!" zeden ze tegen heur. Mor zai huil vol: "t Is zo!" "Den is t zien bewoarengel," zeden ze.
16 En Petrus mor aal kloppen! Dou deden ze deur open en zagen hom. Ze stonden versteld.
17 Hai bedudde heur mit haand, ze zollen stil wezen. Dou vertelde hai hou of de Heer hom tou gevangenis oethoald haar. "Breng Jakobus en aander bruiers doarvan op hoogte," zee e. Dou ging e vot, woaraarns aans hèn.
18 Dou t dag worden was ... grode konsternoatsie onder soldoaten: "Wat zol der toch mit Petrus gebeurd wezen?"
19 Herodes luit noar hom zuiken. Mor dou hai hom nait vinden kon, luit e wachtposten verheuren en terechtstellen. Hai ging van Judea noar Caesarea en bleef doar.
|
